ભારત બાયોટેકના કહેવા પ્રમાણે Covaxin સંપૂર્ણપણે શુદ્ધ વેક્સિન છે જેને તમામ અશુદ્ધિઓ દૂર કરીને તૈયાર કરવામાં આવી છે
દેશમાં કોરોના વાયરસને માત આપવા માટે વેક્સિનેશનનું કામ ચાલી રહ્યું છે. પરંતુ વેક્સિનને લઈ સતત વિવિધ પ્રકારની વાતો સામે આવી રહી છે. આ બધા વચ્ચે કોંગ્રેસી નેતા ગૌરવ પાંધીએ ભારત બાયોટેકની Covaxin ને લઈને એક દાવો કર્યો છે. ગૌરવના કહેવા પ્રમાણે Covaxin બનાવવા માટે ગાયના વાંછરડાના સીરમનો ઉપયોગ કરવામાં આવી રહ્યો છે. આ દાવો તેમણે એક આરટીઆઈમાં મળેલા જવાબના આધાર પર કર્યો છે. તેમના આ નિવેદનને લઈને Covaxin અંગેનો વિવાદ વધુ તેજ થયો છે અને ભારત બાયોટેક પણ પોતાના તરફથી સ્પષ્ટતા કરવી પડી છે.
ટ્વીટમાં કર્યો દાવો
કોંગ્રેસી નેતા ગૌરવ પાંધીનું કહેવું છે કે, Covaxin માં 20 દિવસ કરતાં ઓછી ઉંમર ધરાવતા ગાયના વાંછરડાના સીરમનો ઉપયોગ કરવામાં આવે છે. જો એવું હોય તો સરકારે પહેલેથી આ અંગે જાણકારી શા માટે ન આપી, કારણ કે તેનાથી ધાર્મિક લાગણી દુભાઈ શકે છે.
ગૌરવે ટ્વીટમાં લખ્યું હતું કે, એક આરટીઆઈના જવાબમાં મોદી સરકારે સ્વીકાર્યું છે કે, Covaxin માં ગાયના વાંછરડાના સીરમનો ઉપયોગ થાય છે. તેમાં 20 દિવસ કરતાં ઓછી ઉંમરના વાંછરડાને મારીને તેનો ઉપયોગ કરવામાં આવે છે જે જઘન્ય અપરાધ છે. આ જાણકારી સૌથી પહેલા લોકોની સામે આવવી જોઈએ. ગૌરવ પાંધીએ આ મુદ્દે અન્ય ઘણી ટ્વીટ કરી છે અને ગંભીર સવાલો પણ કર્યા છે.
જે આરટીઆઈ શેર કરવામાં આવી છે તેમાં જાણકારી આપવામાં આવી છે કે, કંપનીઓ દ્વારા આપવામાં આવેલા ડેટા પ્રમાણે ગાયના વાંછરડાના સીરમનો ઉપયોગ વીરો સેલ્સની રિવાઈવલ પ્રોસેસ માટે કરવામાં આવે છે.
ભારત બાયોટેકની સ્પષ્ટતા
આ દાવા બાદ સોશિયલ મીડિયામાં સતત Covaxin ને લઈ સવાલો થઈ રહ્યા છે. આ તમામ સવાલો વચ્ચે ભારત બાયોટેકે સ્પષ્ટતા પણ આપી છે. ભારત બાયોટેકના કહેવા પ્રમાણે વાયરલ વેક્સિનના નિર્માણ માટે ગાયના વાંછરડાના સીરમનો ઉપયોગ કરવામાં આવે છે. તેનો ઉપયોગ સેલ્સના ગ્રોથ માટે થાય છે પરંતુ SARS CoV2 વાયરસના ગ્રોથ કે ફાઈનલ ફોર્મ્યુલામાં તેનો ઉપયોગ નથી થયો.
ભારત બાયોટેકના કહેવા પ્રમાણે Covaxin સંપૂર્ણપણે શુદ્ધ વેક્સિન છે જેને તમામ અશુદ્ધિઓ દૂર કરીને તૈયાર કરવામાં આવી છે. સમગ્ર વિશ્વમાં અનેક દશકાઓથી વેક્સિન નિર્માણ માટે વાંછરડાઓના સીરમનો ઉપયોગ થઈ રહ્યો છે. છેલ્લા આશરે 9 મહિનાથી આ અંગે સાર્વજનિક પ્લેટફોર્મ પર જાણકારી આપી દેવાઈ છે.
